صوت المحب ..(فـــزآآع)

انا اللي خلقت الشعر واللي خلقني من
فضله علي لين سميت خلاقه
اقوله ولا لي من .. وابدع ولا لي من
الاصحاب تحسدني والاعداء بواقه
وترى كبرياء المبدع بحد ذاته فن
اذا كان ما تاثر على باقي اخلاقه
نسرج بنات الفكر ..والنادرات تعن
تمر الاصايل وتتعدى وسباقه
وانا من بلاني في غرامه هو اللي من
عيوني على بيته لمريت سراقه
يافتان طال البعد وانا عليك اون
ونين ابدوي طايح من ظهر ناقه
تكسر عظم ساقه .. ومالت عليه وحن
يمسح عليها .. ويتألم على ساقه
وانا طحت من عينك ولا ملتلي لكن
حنيني حنينه والغلا ترحم اشواقه
الامثال تضرب وانته وش له تسيء الظن
اسولف معك نفسي على الوصل تواقه
الا جيت بستان الخضر يا خفوقي غن
باحاسيس من يسمع عن الوصل ما ذاقه
ولاتقول مالك صوت .. صوت المحب يرن
الى من يحبه من خفوقه لخفاقه
كن الغلا واصلا حلاه الغلا ينكن
لو ان كنته تاخذ من الروح والطاقه
يافتنه مريد الجن ..فتنه مريد الجن
على محجره من لذه الشوق دفاقه
من ارخص دموعه يوم وصلك تأكد بان
ماهو ذاخر دمعه لا طوول فراقه
ولايوجد اعذب من واحن واصدق من
دموع العيون اللي محبه ومشتاقه
على كل حال ان كان قلبك عليه حن
انا مستعد اصير لك راعي الناقه


شعر الشيخ : حمدان بن محمد بن راشد آل مكتوم(فــزآآع)